म.टा. विशेष प्रतिनिधी, नागपूर

वेगळ्या विदर्भाच्या मागणीसाठी विदर्भ राज्य विकास परिषद, वेद आणि जनमंचने स्थापन केलेल्या विदर्भ राज्य समन्वय समितीचा वेगळ्या राज्यासाठी 'लढा विदर्भाचा'ची आज गुढी आज, शुक्रवारी उभारण्यात येणार आहे.

या तीनही संघटना बलाढ्य आहेत. माजी खासदार दत्ता मेघे यांच्या विदर्भ परिषदेचे संपूर्ण विदर्भात सदस्य आहेत. सर्व जिल्ह्यांत सदस्यांना प्रशिक्षण देऊन खास टीम्स तयार करण्यात येणार आहेत. बड्या उद्योजकांचा समावेश असलेल्या वेदने मिहानसह विदर्भाच्या विकासाचे अनेक मुद्दे रेटून धरले. अनेक प्रसंगी कोर्टात न्याय मागितला. जनमंचचे सामाजिक कार्य सातत्याने सुरू असते. विदर्भात त्यांचे तगडे नेटवर्क तयार झाले आहे. वेगळ्या राज्याच्या मागणीवर जनमंचने घेतलेल्या मतदानाला नागपूर, अमरावतीसह अनेक शहरांमध्ये उदंड प्रतिसाद लाभला. त्यात ९० टक्क्यांहून अधिक मतदारांनी विदर्भाच्या बाजूने कौल दिल्याने अनेकांची तोंडे बंद झाली. त्यामुळे या संघटनांनी एकत्र येऊन समिती स्थापन केल्याने वेगळ्या राज्याच्या आंदोलनात आधीपासून सक्रिय असलेल्या समित्यांमध्ये आणखी एकाची भर पडली असली तरी, आंदोलनाला आता नवी दिशा व बळ मिळण्याची शक्यता आहे.

गुढीपाडव्याच्या मुहूर्तावर 'लढा विदर्भाचा'ची सुरुवात शुक्रवारी सायंकाळी ६.३० वाजता बजाजनगर चौकातील सन्मान लॉन येथे होणार आहे.

समितीच्या कार्यकारिणी सदस्यांचा कोणत्याच राजकीय पक्षाशी संबंध नाही, हे विशेष. तथापि, मार्गदर्शन समितीत विविध राजकीय पक्षाचे दिग्गज नेते आहेत. वेगळ्या विदर्भासाठी वातावरण निर्मिती, संपूर्ण विदर्भात जनजागरण आणि राज्यासाठी आंदोलन करणाऱ्या संस्था, संघटनांमध्ये समन्वय साधण्याचा प्रयत्न या समितीच्या माध्यमातून करण्यात येणार असल्याचे समितीचे अध्यक्ष अॅड. अनिल किलोर यांनी सांगितले.