म. टा. प्रतिनिधी, सातपूर

सातपूर गावात गुढी पाडव्यादिवशी भरत असलेला बारा गाड्या यात्रा उत्सव आज रंगणार आहे. बारा गाड्या ओढण्याचा मान मंगेश निगळ यांना मिळल्याचे यात्रेचे आयोजक शांताराम निगळ यांनी सांगितले. दरम्यान यात्रेत दरवर्षी वापरल्या जाणाऱ्या बारा गाड्यांची देखील सफाई करण्यात आली असून सातपूर गावाला यात्रेचे स्वरुप आले आहे.

आज सांयकाळी ४ वाजेपासून गणेशाची सवाद्य मिरवणूक शिवाजी चौकातून निघणार आहे. गावातून ही मिरवणूक एमआयडीसीतील सप्तश्रृंगी मातेचे दर्शन घेत त्रंबकरोडवरील बारा गाड्यांच्या ठिकाणी येणार आहे. गणेशाच्या हस्ते बारा गाड्यांचे पूजन करुन नंतर बारा गाड्या ओढल्या जाणार आहेत. यावेळी पोलिसांचा चोख बंदोबस्त असणार आहे. बारा गाड्यांच्या यात्रेत आलेल्या भाविकांनी आपली सुरक्षेची काळजी घ्यावी असे आवाहन यात्रा उत्सव समितीच्या वतिने करण्यात आले आहे.

सालाबादाप्रमाणे सातपूर गावाचे ग्रामदैवत सप्तश्रृंगी (भवानीमाता) देवीची यात्रा गुढी पाडव्याला भरत असते. या यात्रेला बारा बैलगाड्या ओढण्याची परंपरा आहे. यंदा दिपक मौलै यात्रा उत्सव समितीचे अध्यक्षपदी तर गोकुळ निगळ उपाध्यक्षपदी आहेत. समितीचे अध्यक्ष मौलै यांनी सर्वच राजकिय पक्षांना बारा गाड्यांच्या यात्रेचे निमंत्रण दिले असून पालकमंत्री गिरीश महाजन यांना देखील आमंत्रित केले आहे. दरवर्षी बारा गाड्यांच्या यात्रेला महापालीकेकडून बाबूंचे सुरक्षा कवच उभारले जाते. परंतु यावर्षी महापालीकेने निधीच उपलब्ध करुन न दिल्याने पोलिसांच्या बॅरिगेट्सचा वापर गर्दीला रोखण्यासाठी केला जाणार आहे. यात्रेच्या निमित्ताने पाळणे व विविध खेळणी देखील सातपूरला दाखल झाली आहेत.