WASHINGTON DC— Ann Ayiti, seri konsiltasyon ant Prezidan Michel Martelly, klas politik la ak sosyete sivil la kontinye nan jounen madi 7oktòb 2014 la nan kad efò ki sou pye pou jwenn yon solisyon pou kriz politik la. Lidè ayisyen an te rankontre ak dirijan relijye yo, lidè kèk pati politik ak yon gwoup diplomat etranje.
Pastè Chavannes Jeune, lidè Alyans Kretyèn ak Sitwayen pou Rekonstriksyon d Ayiti (AKRA), mete devan chèf deta a yon pwopozisyon an 12 pwen ki, daprè Misye Jeune, kapab gen plas li nan rechèch solisyon pou kriz la. Lidè AKRA a konseye Prezidan Martelly, antwòt, pou l fasilite òganizasyon yon jèn nasyonal ki ta dire 3 jou.
Nouvèl Ayiti -mèkredi 8 oktòb 2014
- Lis fichye nou pwopoze
- Telechaje
Yon lòt kote, òfisyèl wo-plase nan gouvènman ayisyen an rankontre ak reprezantan plizyè òganizasyon sosyete sivil la plis yon gwoup diplomat etranje pou ba yo yon kont-randi sou reyalizasyon administrasyon Martelly/ Lamothe la pandan 2 premye ane manda Prezidan Martelly a, swa ant 2011 e 2013. Aprè rankont la, lidè ayisyen an fè konnen anbasadè fransè a ann Ayiti, Patrick Nicolosso, remèt li yon envitasyon pou l al vizite peyi Lafrans kote li gen pou l rankontre ak Prezidan François Hollande. Misye Martelly pral pwofite vwayaj sa a pou l fè yon vizit nan Fort de Joux, nan Montay Jurat a, kote ewo nasyonal ayisyen Toussaint Louverture (Le Précurseur de l'Indépendance d'Haiti) te nan prizon e kote li te mouri sa genyen plis pase 2 san zan.
Anfen Prezidan Martelly, ki tap reponn kesyon yon jounalis, pa di si wi ou non Jean Claude Duvalier, ki mouri anba yon atak kadyak samdi 4 oktòb 2014 la, ap gen yon antèman nasyonal ou ofisyèl. Daprè chèf deta a, lalwa prevwa kisa ki dwe fèt apre lanmò yon ansyen prezidan. Jiska prezan moun poko konnen ki dat antèman an pral dewoule.