WASHINGTON DC— Polis Nasyonal d Ayiti (PNH) sèvi ak gaz lakrimojèn ak kanon dlo pou gaye manifestasyon opozisyon an òganize vandredi 17 oktòb 2014 la nan okazyon 208èm anivèsè asasina anperè Jean Jacques Dessalines, fondatè Repiblik d'Ayiti. Otorite yo nan PNH la te modifye pakou kòtèj la pou "pwoteje" patisipan yo, sektè komèsyal la ak byen prive. Fòs de lòd yo entèdi manifestan yo antre nan Petyonvil kote pifòt elit ekonomik peyi a abite. Lapolis, jiska midi vandredi, te kontinye ap itilize gaz lakrimojèn pou anpeche fòmasyon tigwoup manifestan ki tap fòme pasi-pala yon fason pou evite manifestasyon an al regwoupe.
Nouvèl Ayiti -vandredi 17 oktòb 2014 update
- Lis fichye nou pwopoze
- Telechaje
Objektif manifestasyon an, dapre òganizatè yo, se pou reklame demisyon prezidan Michel Martelly epi pwoteste kont gouvènman an yo di ki pase 3 zan san li pa òganize eleksyon nan peyi a. Daprè ansyen depite Serge Jean Louis, pòtpawòl Mouvman Patriyotik Opozisyon Demokratik la (MOPOD) -youn nan gwoup ki mete mouvman pwotestasyon an sou pye-- lapolis pat gen dwa chanje itinerè manifesasyon an san li pat diskite avèk komite òganizatè a.
Nouvèl Ayiti -vandredi 17 oktòb 2014
- Lis fichye nou pwopoze
- Telechaje
Menm jounen vandredi 17 oktòb la, Prezidan Michel Martelly avèk li plizyè manm gouvènman an, te ale Pon Wouj, nan antre nò kapital la, Pòtoprens, kote li depoze yo kouwònf lèanba pye Anperè Dessalines . Aapre sa, gouvènman an rankontre sipòtè l yo nan ansyen avyasyon militè Bowen Field, tou prè Pon Wonj, pou yon rasanbleman kap make 208èm anivèsè asasina Jean-Jacques Dessalines. Plizyè gwoup mizikal t ap anime aktivite politik sa a.
Anfen, nan jounen jedi 16 oktòb 2014 la, Prezidan Martelly rankontre ak konstitisyonalis Odette Roy-Fombrun epi lidè yon regwoupman politik nan kad seri konsiltasyon lap fè sou kriz elektoral la. Madan Fombrun fè konnen li bay prezidan an konsèy pou l fòme yon komisyon konsilyasyon pou travay sou rechèch yon solisyon pou kriz la. Konstitisyonalis la pa dakò ak sektè kap mande demisyon chèf deta a.