Asasina jounal Steven Sotloff nan Siri, anba men konbatan islamik yo, pwovoke gwo reyaksyon nan Kongrè Ameriken an kote palmantè yo lanse apèl pou Lèzetazini pran rapidman aksyon djanm kont Eta Islamik la.
Pa egzanp, Depute Ed Royce, prezidan komisyon afè etranjè nan Chanm dè Reprezantan an, fè konnen asasina jounalis la --jan asasina sa a dewoule a-- se yon bagay ki ba l degoutans. Depite Royce, ki se yon republiken, di li-menm ak kòlèg li yo nan komisyon afè etranjè a voye kondoleyans yo bay fanmi Steven Sotloff e li atire atansyon sou le fèt ke militan islamik yo deja touye plizyè milye sivil inosan nan Irak ak Siri; daprè li, militan yo ap sèvi ak video pou yo tabli yon eta islamik virtyèl --sa yo rele yon Kalifa-- sou entènèt la. Depite Ed Royce di:
“Sa ki espesyal avèk estrateji Eta Islamik la, se fason yo pibliye enfòmasyon yo, se mwayen yo itilize pou yo ranfòse kapasite yo pou yo touye moun e pou yo teworize moun.”
Sou menm dosye a, pòtpawòl Pentagòn nan, John Kirby --ki tap pale madi 2 septanm 2014 la sou dosye a-- fè konnen aviyasyon militè Lèzetazini pral kontinye atake pozisyon mllitan yo nan Irak yon fason pou elimine mwayen yo ta genyen pou yo mete an danje pèsonèl ak enstalasyon diplomatik ou militè ameriken ki nan peyi a. Se konsa tou, daprè pòtpawòl la toujou, atak sa yo pral apiye transpò asistans imanitè ki pral jwenn moun militan yo tap pèsekite nan Irak.