Nan Ikrèn, gouvènman prezidan Petro Poroshenko a anonse vil Novoazovsk, nan pati sidès peyi a, tonbe anba men lame Larisi. Anons sa a parèt sou paj Tritter Konsèy Sekirite ak Defans Nasyonal Ikrèn nan ki ajoute anpil ti vilaj ki ozalantou vil la tonbe tou anba men sòlda ris yo.
Prezidan Poroshenko anile yon vizit li ta pral fè nan peyi Tiki e li mande yon reyinyon dijans manm konsèy sekirite ak defans la pou yo analize sitiyasyon an. Depi kèk tan deja, otorite yo nan Ikrèn ak peyi oksidantal yo te gen preokipasyon devan posibilite pou Larisi ta entèvni dirèkteman nan konfli kap dewoule nan Ikrèn nan, yon akizasyon Moskou te demanti plizyè fwa.
Oganizasyon pou Sekirite ak Kowoperasyon ann Ewòp la (OSKE) ap fè yon rankont spesyal jedi 28 out 2014 la sou evolisyon sitiyasyon an nan Ikrèn, tandiske misyon Lèzetazini nan OSKE a ekri sou paj Twitter li pou l di:
“Vyolasyon Larisi komèt nan Ikrèn nan pral nan tèt ajanda diskisyon OSKE ap fè Jodi a nan vil Vyèn.”
Lòt Reyaksyon gouvènman ameriken an: Depatman Deta a fè konnen li gen prèv ki montre Larisi voye plis materyèl ak ekipman militè nan pati lès Ikrèn. Pòtpawòl depatman an, Jen Psaki, di pami materyèl ak ekipman sa yo genyen tank, kamyon blende ak lans-wòkèt.
“Antre Larisi antre sou tèritwa ikrenyen an montre yon kontratak Moskou ta va dirije ap dewoule kounye a menm nan vil Donetsk ak Luhansk. Li klè sa ba nou gwo preokipasyon. Mwen vle fè remake tou --menm si m poko fin si nèt, men anpil nan nou wè sa-- nou gen preokipasyon tou poutèt gouvènman Larisi a pa gen volonte pou l di laverite menm lè moun jwenn sòlda li yo sou yon distans 50 kilomèt anndan tèritwa ikrenyen an.”
Bò kote pa l, prezidan fransè a, François Hollande, di se tap yon bagay entolerab e innakseptab si ankèt ta montre vrèman twoup militè ris antre sou tèritwa ikrenyen an.