ಯಶೋದಾಬೆನ್‌ ಪತ್ನಿ ಎಂದು ಒಪ್ಪಿಕೊಂಡ ಮೋದಿ

ವಡೋದರಾ: ಹದಿನೇಳನೆ ವಯಸ್ಸಲ್ಲಿ ಆಗಿದ್ದ ಮದುವೆಯನ್ನು ಕೊನೆಗೂ ಒಪ್ಪಿಕೊಂಡಿರುವ ಬಿಜೆಪಿಯ ಪ್ರಧಾನಿ ಅಭ್ಯರ್ಥಿ ನರೇಂದ್ರ ಮೋದಿ, ವಡೋದರಾದಿಂದ ಚುನಾವಣೆಗೆ ಸ್ಪರ್ಧಿಸಲು ಸಲ್ಲಿಸಿದ ನಾಮಪತ್ರದಲ್ಲಿ ಮೊದಲ ಬಾರಿಗೆ ಹೆಂಡತಿಯ ಹೆಸರನ್ನು ದಾಖಲಿಸಿದ್ದಾರೆ.

ಜನಸಾಗರದ ಮಧ್ಯೆ ವಡೋದರ ಲೋಕಸಭಾ ಕ್ಷೇತ್ರದಿಂದ ತಮ್ಮ ಉಮೇದುವಾರಿಕೆಯನ್ನು ಬುಧವಾರ ಸಲ್ಲಿಸಿದಾಗ ಅರ್ಜಿಯಲ್ಲಿರುವ ಪತ್ನಿ ಸ್ಥಾನದಲ್ಲಿ ಯಶೋದಾಬೆನ್‌ ಹೆಸರು ತುಂಬಿಸಿದ್ದರು. ಆಕೆ ಬ್ರಹ್ಮಾನ್ವಾಡದಲ್ಲಿ ಅಧ್ಯಾಪಕಿಯಾಗಿ ಸೇವೆ ಸಲ್ಲಿಸಿ ಈಗಾಗಲೇ ನಿವೃತ್ತರಾಗಿದ್ದಾರೆ. ಅವರ ಊರು ಮೋದಿಯ ತವರು ವಡ್ನಗರದಿಂದ 35 ಕಿಮೀ ದೂರದಲ್ಲಿದೆ.

ಗುಜರಾತ್‌ನಲ್ಲಿ ಕಳೆದ ನಾಲ್ಕು ವಿಧಾನಸಭೆ ಚುನಾವಣೆಯಲ್ಲಿ(2001, 2002, 2007, 2012) ಸ್ಪರ್ಧಿಸುವಾಗಲೂ ಅವರು ನಾಮಪತ್ರದಲ್ಲಿ ಆರ್‌ಎಸ್‌ಎಸ್‌ ಪ್ರಚಾರಕರಾಗಿದ್ದ ಮೋದಿ, ಪತ್ನಿ ಹೆಸರಿನ ಮುಂದೆ ಏನನ್ನೂ ಭರ್ತಿ ಮಾಡುತ್ತಿರಲಿಲ್ಲ. 2001ರಲ್ಲೇ ಈ ವಿಚಾರದಲ್ಲಿ ಕಾಂಗ್ರೆಸ್‌ ಬಹಿರಂಗ ಸವಾಲು ಹಾಕಿ ಪಾಂಪ್ರೆಟ್‌ಗಳನ್ನೂ ಹಂಚಿ ಮೋದಿ ಅವರನ್ನು ಕೆಣಕಿತ್ತು. ಆದರೂ ಮೋದಿ ಪ್ರತಿಕ್ರಿಯಿಸಿರಲಿಲ್ಲ. ಆದರೆ ಈ ಬಾರಿ ಮೋದಿ ಸತ್ಯ ಒಪ್ಪಿಕೊಂಡಿರುವುದು ಕಾಂಗ್ರೆಸ್‌ ವಲಯದಲ್ಲಿ ಸಂತಸಕ್ಕೆ ಕಾರಣವಾಗಿದೆ. ಈ ಪ್ರಕಟಣೆಯಿಂದ ಮೋದಿ ಅವರಿಗೆ ಹಿನ್ನಡೆಯಾಗಲಿದ್ದು, ಮಹಿಳೆಯರು ಯಶೋದಾಬೆನ್‌ ಪರ ಕನಿಕರ ತೋರಲಿದ್ದಾರೆ, ಇದರಿಂದ ಮೋದಿ ಹಾಗೂ ಬಿಜೆಪಿ ಜನಪ್ರಿಯತೆಗೆ ಹಿನ್ನಡೆಯಾಗಲಿದೆ ಎಂದು ಕಾಂಗ್ರೆಸ್‌ ವಲಯದಲ್ಲಿ ಲೆಕ್ಕಾಚಾರ ಶುರುವಾಗಿದೆ.

ಮದುವೆ ಎಂದೂ ನೆರವೇರಿಲ್ಲ ಎಂದು ಕುಟುಂಬದ ಸದಸ್ಯರು ಹೇಳಿದರೂ, ಪತ್ನಿಯನ್ನು ಒಪ್ಪಿಕೊಳ್ಳುವುದರಿಂದ ಶುದ್ಧಚಾರಿತ್ರ್ಯ ಹೊಂದಲು ಸಾಧ್ಯವಾಗಲಿದೆ ಎಂದು ಕಾನೂನು ಸಲಹೆಗಾರರು ನೀಡಿದ ಸಲಹೆ ಪ್ರಕಾರ ಮೋದಿ ನಡೆದುಕೊಂಡಿದ್ದಾರೆ ಎಂದು ಹೇಳಲಾಗುತ್ತಿದೆ.

ಆದಾಯ ಗೊತ್ತಿಲ್ಲ:

ಸಾರ್ವಜನಿಕ ಪ್ರತಿನಿಧಿ ಕಾಯಿದೆ 1951ರ ಪ್ರಕಾರ ಪತ್ನಿಯ ಆಸ್ತಿ ವಿವರವನ್ನು ಪತಿ ತಮ್ಮ ನಾಮಪತ್ರದಲ್ಲಿ ನಮೂದಿಸಬೇಕು. ಆದರೆ ಮೋದಿ ಅವರು ಸಲ್ಲಿಸಿದ ಅರ್ಜಿಯಲ್ಲಿ ಯಶೋದಾಬೆನ್‌ರ ಆದಾಯ ಮತ್ತಿತರ ವಿವರಗಳ ಮಾಹಿತಿಯಿಲ್ಲ ಎಂದು ಬರೆದಿದ್ದಾರೆ.

ಮೋದಿ ಅವರು ಮಣಿನಗರದಿಂದ ಉಮೇದುವಾರಿಕೆಗೆ ಸಲ್ಲಿಸಿದ ತಮ್ಮ ನಾಮಪತ್ರದಲ್ಲಿ ಪತ್ನಿ ಹೆಸರು ದಾಖಲಿಸಿಲ್ಲ ಎಂದು 2012ರಲ್ಲಿ ಮೋದಿ ವಿರುದ್ಧ ಕೋರ್ಟ್‌ಗೂ ಹೋಗಲಾಗಿತ್ತು. ಆದರೆ ಈ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯನ್ನು ಕೋರ್ಟ್‌ ವಜಾ ಮಾಡಿತ್ತು.

ನರೇಂದ್ರ ಮೋದಿ ಅವರ ವೈವಾಹಿಕ ವಿಚಾರಕ್ಕೆ ಸಂಬಂಧಪಟ್ಟಂತೆ ವೀರಪ್ಪ ಮೊಯ್ಲಿ ಸೇರಿದಂತೆ ಕಾಂಗ್ರೆಸ್‌ನ ನಾನಾ ನಾಯಕರು ಈ ಲೋಕಸಭಾ ಚುನಾವಣೆಯಲ್ಲೂ ಮೋದಿ ವಿರುದ್ಧ ಹರಿಹಾಯ್ದಿದ್ದರು. ಮದುವೆ ವಿಚಾರದಲ್ಲಿ ತಮ್ಮ ಶುದ್ಧ ಚಾರಿತ್ರ್ಯ ಸಾಬೀತುಪಡಿಸುವಂತೆ ಕಾಂಗ್ರೆಸ್ ಆಗಾಗಾ ಒತ್ತಾಯಿಸುತ್ತಲೇ ಬಂದಿದೆ. ಅರವಿಂದ ಕೇಜ್ರಿವಾಲ್‌ ಕೂಡ ಮದುವೆ ವಿಚಾರದಲ್ಲಿ ಮೋದಿಗೆ ಟಾಂಗ್‌ ಕೊಟ್ಟಿದ್ದರು.