کوئٹہ میں دھماکہ، 5 افراد زخمی

کراچی — 
صوبہ بلوچستان کے شہر کوئٹہ میں جمعے کو زور دار دھماکے میں 5 افراد شدید زخمی ہوگئے۔

پولیس کے مطابق دھماکہ خیز مواد جان محمد روڈ پر واقع ایک دکان کے باہر رکھاگیا تھا جس کے پھٹنے سے دھماکہ ہوا اور دکان کے نزدیک موجود 5 افراد شدید زخمی ہوگئے۔ دھماکہ اتنا شدید تھا کہ اس کی آواز دور دور تک سنی گئی۔

دھماکے سے دکان کو شدید نقصان پہنچا، اور اس کی آواز سے جان محمد روڈ پر واقع کئی دکانوں کےشیشے ٹوٹ گئے۔

دھماکے کے بعد علاقے میں شدید خوف وہراس پھیل گیا۔

دھماکے کے کچھ ہی دیر بعد امدادی ٹیمیں اور ایمبولینس گاڑیاں جائے واقعہ پر پہنچ گئیں۔اور زخمی ہونے والوں کوقریبی اسپتال منتقل کردیا گیا ہے۔ جبکہ پولیس اور دیگر تحقیقاتی اداروں نے علاقے کو گھیرے میں لے کر تحقیقات کرنا شروع کردی ہیں۔

بلوچستان کے وزیراعلی نواب اسلم رئیسانی نے کوئٹہ کے دھماکے کی شدید مذمت کرتے ہوئے پولیس سے رپورٹ طلب کرلی ہے۔