د انډونیشیا پوځي الوتکې غورځېدو پېښه کې ۱۳تنه وژل شوي

د انډونیشیا پوځي الوتکه د وامینا سره نزدې په غرونو کې غورځېدلې او الوتکه کې سواره ۱۳ کسان وژل شوي دي.

د انډونیشیا د هوائي ځواک لخوا وي او ای ته په لېږل شوي بیان کې ویل شوي چې هرکولیس ـ سي ـ ۱۳۰ الوتکه کې ۱۲ټنه خوراکي سامان بار ؤ او د ټیميکا نه وامینا ته روانه وه، او د خپل منزل نه ۲۰۰ کلومیټره لرې غورځېدلې ده.

الوتکه د ځاي وخت ترمخه سحر پاؤکم شپږ بجې د ټیمیکا نه الوتې او وامینا ته به پاؤباندې شپږ بجې رسېده او د کوزېدو نه لږه شيبه وړاندې يې د کنټرول ټاور سره اړیکې قطع شوې ده.

د انډونیشیا د لټون او مرستو ادارې مشر اېوان احمدرسکي ټيټس ویلي د الوتکې د غورځېدو د ځایه مړي راویستل شوي او وامینا ته وړل شوي دي.

د هوائي ځواک مشر اګوس سپریانتا ځاي رسنیو ته ویلي خراب موسم د الوتکې غورځېدو علت کېدی شي.

انډونیشیا کې د یوې میاشتې نه په کمه موده کې دا درېم ځل دی چې هوايې پېښې پکې رامنځته شوې.

په ۲۴م نومبرد انډونیشیا د پوځ هیلي کاپټر غورځېدو پېښه کې درې کسان وژل شوي او د هغې نه یوه اوونۍ وروستو یوه الوتکه چې ۱۳ تنه پکې سوراه وو سنګاپور سره نزدې په سمندر کې غورځېدلې وه.