नववर्षाच्या स्वागतासाठी शहरात विविध कार्यक्रम

म. टा प्रतिनिधी, नाशिक

वसंत ऋतूच्या आगमनाबरोबरच हिंदू संस्कृतीनुसार नवीन वर्षाचा प्रारंभ गुढीपाडव्याच्या दिवशी होतो. या नववर्षाच्या स्वागतासाठी नाशिक शहरातील विविध भागातून शोभायात्रा काढण्यात येणार आहे. नववर्ष स्वागत यात्रा समिती व संस्कृती संवर्धन न्यासच्यावतीने गुढीपाडव्याचे स्वागत करण्यासाठी नाशिक शहरातील चार ठिकाणाहून ही शोभायात्रा काढण्यात येणार आहे. शोभायात्रा पाडव्याच्या दिवशी सकाळी ६ वाजून २९ मिनिटांनी सुरू होईल, यात ढोल, ताशे, लेझिम, घोडे, पारंपरिक वेशभूषा केलेले नागरिक मोठ्या संख्येन सहभागी होणार आहेत.


पंचवटीत तीन यात्रा

पंचवटी परिसरातील नागचौक, भद्रकालीतील साक्षी गणेश मंदिर, रविवार पेठेतील सुंदर नारायण मंदिर, या तीन ठिकाणाहून आणि द्वारका येथून हिंदू नववर्ष यात्रांची सुरुवात होणार आहे. या यात्रेचा समारोप जुना भाजी बाजार, गोदाघाट, नारोशंकर मंदिरासमोर होणार आहे. समारोपाप्रसंगी श्रीराम शक्तिपीठाचे १००८ महामंडलेश्वर स्वामी सोमेश्वरानंद सरस्वती महाराज यांची प्रमुख उपस्थिती राहील.

इंदिरानगरला चित्ररथ

इंदिरानगरच्या वेगवेगळ्या भागातून स्वागत यात्रा निघणार आहेत. यंदा स्वागत यात्रांबरोबरच जल्लोष नववर्षाचा खाद्यसंस्कृतीचा हा दोन दिवसांचा कार्यक्रम आयोजित करण्यात आला आहे. यावेळी ११ ठिकाणांहून विविध पारंपरिक वेशभूषा, चित्ररथ, सामाजिक संदेश देणारे फलक घेवून, उंट, घोडे यांच्यासह ढोल ताशांच्या गजरात या स्वागतयात्रा निघणार आहेत. यंदा स्वागत यात्रेच्या माध्यमातून स्वच्छतेचा संदेश देण्यात येणार आहे. पेठेनगर येथे सकाळी साडेआठ वाजता गुढीचे पूजन करण्यात येणार आहे. स्वागत यात्रांचा समारोप पेठेनगर येथील राधारमण लॉन्स येथे होणार आहे. त्याचबरोबर या ठिकाणी विविध प्रकारचे खाद्य व संस्कृतीचे माहिती देणारे स्टॉल उभारण्यात येणार आहे. गुढीपाडव्याच्या दुसऱ्या दिवशी सायंकाळी याठिकाणी प्रकाश पाठक यांचे व्याख्यान होवून कार्यक्रमाचा समारोप होणार आहे. यंदाही दरवर्षीप्रमाणे विविध क्षेत्रात सामाजिक काम करणाऱ्या संस्थांचा गौरव करून त्यांना अकरा हजार रुपये व गौरवचिन्ह देवून गौरविण्यात येणार आहे. नागरिकांनी स्वागत यात्रेत सहभागी होण्याबरोबरच दोन दिवसांच्या खाद्य संस्कृतीचा लाभ घ्यावा, असे आवाहन आयोजकांनी केले आहे.

देवळालीत प्रथमच

हिंदू नववर्षाच्या स्वागतासाठी देवळालीत सामाजिक व सांस्कृतिक परंपरेचे प्रथमच दर्शन घडविण्यात येणार आहे. या निमित्ताने हिंदू नववर्ष स्वागत शोभायात्रेचे भव्य आयोजन करण्यात आले असल्याची माहिती समितीच्या वतीने देण्यात आली.

स्वागत समितीतर्फे यात्रा

नववर्ष स्वागत यात्रा समितीच्यावतीने शुक्रवारी शहराच्या विविध भागातून स्वागत यात्रा काढण्यात येणार आहे. गंगापूर रोड, महात्मानगर, तिडके कॉलनी, शरणपूर रोड, काळेनगर अशा विविध भागातून ही यात्रा निघणार आहे. यावेळी पारंपरिक वेशभूषा केलेली लहान मुले, महिलांची बाइक रॅली, सायकल रॅली, तालरूद्र ढोल पथकाचे वादन असे विविध कार्यक्रम यात समाविष्ट असणार आहेत. शहरातील महात्मानगर, निर्मलनगर, नरसिंहनगर, श्रीराम मंदिर, पंडित कॉलनी, कॉलेज रोड, तिडके कॉलनी, संभाजी चौक या ठिकाणाहून यात्रा प्रारंभ होणार आहे. सकाळी ९ वाजेच्या दरम्यान बीवायके कॉलेज चौक, कॉलेजरोड येथे ही यात्रा एकत्र येऊन यशवंत पाठक यांच्या उद्बोधनाने समारोप होईल. या यात्रेत सहभागी होण्याचे आवाहन समितीतर्फे करण्यात आले आहे.

ब्रम्हध्वज मिरवणूक

गुढीपाडव्यानिमित्त नाशिकरोडला विविध कार्यक्रम होणार आहेत. यामध्ये हिंदू नववर्ष स्वागत समितीतर्फे सकाळी सातला देवळाली गावातील शिवाजी महाराज समाज मंदिरापासून ब्रम्हध्वज यात्रा सुरू होईल, अशी माहिती संयोजक अक्षय एडके यांनी दिली.