Nadejda Savçenko quru açlıq grevine başladı – adliyeci

Rusiyede mahküm etilgen ukrain Nadejda Savçenko quru açlıq grevine başladı. Bunı çarşenbe künü adliyecisi Mark Feygin Twitterde bildirdi.

Nadejda Savçenko onı Ukrainağa qaytarmalarını talap ete.

Mart 22-de Rostov vilâyeti Donetsk şeeri mahkemesi Ukraina vatandaşını 2014 senesi yazda Lugansk civarında eki Rusiye jurnalistiniñ öldürüvi ile qabaatlap, onı 22 yılğa qadar azatlıqtan marum qaldırdı. Aprel 5-te üküm işke tüşürildi.

Savçenko bütün qabaatlarnı red ete, Rusiye mahkemesiniñ ükmüni ise red ete, ve şikâyet etmekten vazgeçti.

Üküm ilân etilgen soñ Ukraina prezidenti Petro Poroşenko Savçenko azat etilsin dep, Donbasstaki mahsus tedbirler alanında yaqalanğan eki rus Aleksandr Aleksandrov ve Yevgeniy Yerofeyevni azat etmege azır olğanını bildirdi.

Kreml ukrain arbiy uçucısı «deñiştirile bile dep», qarar Vladimir Putin tarafından qabul etilecegini bildirdi.