Papa Françesku i bëri thirrje botës me rastin e Pashëve që të përdorë "armët e dashurisë" kundër "dhunës së verbër dhe brutale". Komentet e Papës bëhen pas sulmeve të së martës në Bruksel.
Udhëheqësi i katolikëve të botës kryesoi një meshë për Pashkët në Sheshin e Shën Pjetrit nën masa të forta sigurie.
Më pas, ai mbajti mesazhin e tij "Urbi et Orbi" në të cilin uroi që "Jezusi t’i afrojë më shumë njerëzit në këtë festë të Pashkëve me viktimat e terrorizmit, i cili vazhdon të shkaktojë gjakderdhje në pjesë të ndryshme të botës.”
Papa Françesku u shpreh gjithashtu kundër "refuzimit", që kaq shumë emigrantë dhe refugjatë po ndiejnë në Evropë, e cila po përjeton krizën më të madhe të migrimit që nga Lufta e Dytë Botërore. "Shumë shpesh, këta vëllezër dhe motra tona përgjatë rrugës së tyre takohen me vdekjen ose me refuzimin nga ata që mund t’u ofronin mirëseardhjen dhe ndihmën", tha Papa.