Riza Åževkiyev: Bütün dünyaÄŸa dağılÄŸan halq halq olmaqtan çıqa

Rusiye qırımtatarlarnıñ vatanı Qırımda yaşayış şaraitlerini dayanılmaz derecege ketirip, qırımtatar halqı genotsidiniñ yañı şekline başladı.

Vaziyet 37 senesini añdıra: adamlarnı qorquzıp, yarınki künden şübelenmege zorlaylar. Meclis-Qurultaynıñ Qırımdaki işi felç etildi, farqlı tüşüngenler taqip etile, halq faalleriniñ aqqından keleler, işğalcilerge hızmet etmekten vazgeçken cemaat teşkilâtları bütünley yoq etildi. Rusiye qanunlarını qullanıp hırsızlıq yapalar. Qırımtatar Milliy Qurultayı tesis etken «Qırım» Fondu» Hayriye teşkilâtınıñ mal-mülki de istisna olmadı.

​Halq oğrağan ömür tarzına alıştırmaq maqsadı ile halqnıñ diniy ve maneviy yaşayışında birinci baqıştan körünmegen mefküreviy iş keçirilmekte.

Bundan sebep adamlar kütleviy sürette yarımadanı terk etip, Ukraina ya da diger memleketlerde yerleşeler, ketken gençlerni keri qaytarmaq imkânsız olacaq.

Belki de, bu vaziyet 1944 senesiniñ sürgünliginden beter, çünki o vaqıt halq bir yerde yerleştirilgen edi, bütün qıyınlıqlarğa baqmadan, inkişaf etmek imkânı bar edi.

Bütün dünyağa dağılğan halq halq olmaqtan çıqa ve Kremldeki Putin rejiminiñ faşist ideologları qırımtatar halqına böyle bir soñunı azırlaylar.

Bütündünya qırımtatar kongressiniñ maqsadı genotsidniñ bu şeklini toqtatmaq, dünya toplulığını Qırımnı işğalden azat etmek içün ciddiy areketler yapılmasına çağırmaq, Ukraina akimiyetini tamır halqına Ukraina terkibinde milliy-territorial muhtariyet şeklinde taqdirini belgilemek aqqını kefil etecek qanunlarnıñ qabul etilmesine çağırmaqtır.

Sozulmamalı!

Kongressniñ yañı saylanğan prezidenti ve daimiy organı eskisinden farqlı olıp, Kongress qararlarını birinci künden başlap yerine ketirmeli.

Öz noqtaiy-nazarımnı bildirip, prezident olaraq qırımtatar halqınıñ lideri Mustafa Cemilev saylanmalı, dep tüşünem, çünki bu insan halqnıñ aqları oğrunda küreşip, uzlaşmalarğa razı olmay.

Onıñ halqara itibarı Kongresske qırımtatar halqını qorçalamağa yardım etecek.

Unutmañız, halqımız ölüm telükesinde buluna!

Riza Şevkiyev, «Qırım» Fondu hayriye teşkilâtınıñ müdiri

«Bloglar» rubrikasında bildirilgen fikir-tüşünceler müelliflerniñ noqtaiy-nazarını ifadelep, muarririyet baqışlarını aks ettirmemesi mümkün