Türk akimiyeti, yarımadanı mecburen terk etken qırımtatarlar içün, Herson vilâyetinde biñ tane evniñ qurulışına para ayırmağa azır. Bu aqta, Zerkalo nedeli agentligine qırımtatar milliy Meclisi reisi Refat Çubarov bildirdi.
Onıñ qayd etkenine köre, bu leyhanı ömürge keçirmek içün, icra akimiyetiniñ struktura ğayretlerini uyğunlaşmaq kerek. Mında topraq ayırıluvı, kerekli vesiqalarnıñ azırlanması, qarar aluv aqqında söz yürütilmekte.
«Mezkür bir biñ evlerini biz Herson vilâyetinde qurmaq niyetindemiz. Bu qırımtatarlar yaşağan toplu yerleriniñ eki ya da üç qasabası olacaq. Adamlar bütün Ukraina boyunca tarqatılmasın, olarnıñ tuvğan tilinde tasil almaq aqqını, başqa medeniy ihtiyaclarını yerine ketirmek içün böyle qarar aldıq», - dep qayd etti Çubarov.
Petro Poroşenko mart 9-10 künleri Turkiyede iş ziyareti ile bulunıp, memleket akimiyetinen körüşüvlerni keçirdi. Çarşenbe künü Poroşenko ve Turkiye prezidenti Recep Tayip Erdoğan, eki devletniñ strategik işbirligi aqqında umumiy deklaratsiyasını imzaladılar.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.