WASHINGTON DC— Plizyè manm sena ayisyen an di yo apiye lide pou Prezidan Pwovizwa a, Jocelerme Privert, lanse yon ankèt ofisyèl sou fason ansyen administrasyon ki te gen nan tèt li Prezidan Michel Martelly te jere lajan peyi a. Daprè palmantè sa yo, se yon fason pou otorite responsab yo jwenn repons pou kesyon plizyè sektè genyen sou jesyon sa a .
Nouvèl Ayiti pou madi 23 fevriye 2016 la
- Lis fichye nou pwopoze
Telechaje
- MP3 - 128.0kb/s - 8.4MB
- MP3 - 64.0kb/s - 4.2MB
Yon lòt kote, kandida a la prezidans Pati Fanmi Lavalas la, Doktè Maryse Narcisse, ki t ap pale ak laprès apre yon rankont ak Prezidan Pwovizwa a, Jocelerme Privert, ensiste sou fòmasyon yon komisyon verifikasyon elektoral ak yon nouvo Konsèy Elektoral Pwovizwa a. Doktè Narcisse pale konsa nan moman Prezidan Privert ap kontinye konsiltasyon lap fè ak divès sektè nan vi nasyonal la anvan li nonmen yon nouvo Premye Minis.
Anfen, direktris rejyonal Fondasyon Pan-Amerikèn Devlopman an (PADF), Madam Nadia Cherrouk, bay Lavwdlamerik yon entèvyou nan jounen lendi 22 fevriye a -entèvyou kote li fè yon bilan entèvansyon PADF ak Biwo Monetizasyon an nan kad plizyè pwogram devlopman kominotè nan zòn vilnerab plizyè vil provens peyi Dayiti ak kapital la, Pòtoprens. PADF fè entèvansyon li yo an kolaborasyon ak Platfòm Kominotè yo nan domèn tankou enfrastrikti, asenisman, dlo potab, enèji, rekonstriksyon, reparasyon kay ak reyabilitasyon katye yo apre tranblemanntè 12 janvye 2010 la.