Qırımlı Jamala «Eurovision-2016» yarışında Ukrainanı temsil etecek

Qırımlı ukrain yırcısı Jamala Ukrainanı «Eurovision-2016» yır yarışında temsil etecek: final neticeleri böyle oldı.

Jüri qırımlı yırcığa 2-nci yer bergen olsa da, seyircilerniñ reyleri müim oldı: rey bergenlerniñ 37% Jamalağa qoltuttı.

Jamala dörtünci olaraq çıqışta bulundı. Finalğa 6 kişi keçken edi.

Jamala «1944» yırını taqdim etti. Bundan soñra qırımlılarnı qırımtatar tilinde selâmladı.

Jüri azası Ruslana Lıjiçko qayd etti ki, «Jamala maña kene tesir etti». «Bu bugün azap çekken Ukrainadır», – dedi Ruslana Jamalanıñ yırı aqqında.

Jüriniñ diger azası Konstantin Meladzeniñ qayd etkenine köre, Jamala «Eurovision-2016» yarışında Ukrainanı temsil ete bile. Aynı vaqıtta o, Jamala taqımınıñ işini ve çıqışını tenqit etti.

«Çıqışıñıznı kördik, yırıñız – ayrı ikâye, sanalaştıruv – ekinci ikâye, siziñ tış körünişiñiz ve anteriñiz – üçünci ikâyedir. Bu üç ikâyeniñ bir-birine alâqası yoq, bir-birinden mustaqil şekilde yapılğanlar, çünki yırnı bir insan yazdı, sanalaştıruv diger insanğa ait, anter – üçünci insannıñ işidir. Eurovisionda taqım ile beraber ğalebe qazanmaq mümkün, taqımnen beraber çalışmaq kerek, taqımğa işanmaq kerek, adamlarnı celp etmek kerek, er bir müim bir yer ala... Bu anterde, bu körüniş ile bir «Eurovisionda» ğalip çıqamamız», – dep ayttı o.

«Zayıf yer – anter», – dep şaqalaşmağa tırıştı Jamala.

Meladze devam etti. «Yarı finaldan finalğa qadar progress olğanını körmeyim. Mart 5-ke qadar böyle bir taqıp toplap, er taraflı azırlanmağa tileyim», – dep ayttı Meladze.

Jamala ise «kerek olsa, yapacağını» ayttı.

Prodüser, bestekâr Andrey Danilko yır metnniñ eser adına bağlı olğanını tenqit etti.

«1944» raqamı siyasiy bir oyun olaraq qabul etile bile. Buña yol bermemek içün, belki, bundan vazgeçmek kerek edi», – dep qayd etti o.

Jamalanıñ aytqanına köre, bu raqam – «hatıradır, aynı o sene biñlerce qırımtatarınıñ taqdirini deñiştirdi».

Ukraina prezidentiniñ matbuat kâtibi Svâtoslav Tsegolkonıñ fikirince, Jamala qırımtatar halqına qarşı yapılğan cinayetlerni bütün dünyağa hatırlata bile.

Qırım sakinleri rey berip olamadılar, çünki 2014 senesi Rusiye işğal etken yarımadada ukrain operatorları çalışmay.

Qırımtatar Milliy Meclisiniñ reisi Refat Çubarov dedi ki, Qırımdaki operatorlar yarımada sakinlerine Ukraina içün rey bermege izin bermediler.

200 million seyircini qaplap alğan dünyanıñ 40 memleketinde «Eurovision» er yıllıq yır yarışı büyük diqqat celp ete ve keçken yarışta ğalebe qazanğan yırcınıñ memleketinde keçirile.

2005 senesi «Eurovision» Ukrainada keçirilgen edi. 2004 senesi Ruslana Lıjiçko ğalip çıqqan edi, bu sebepten de Ukraina halq artisti unvanını qazandı.

​