4 musulmannıñ apiske alınmasından appelâtsion şikâyeti Qırım mahkemesi tarafından fevral 29-da baqılacaq – adliyeci

Qırım adliyecisi Emil Kürbedinovnıñ bildirgenine köre, Rusiyege boysunğan Qırım Yuqarı mahkemesi fevral 11-de yaqalanğan ve soñra «terrorizm» ile qabaatlanıp apiske alınğan Müslim Aliyev, Emir-Üsein Kuku, Enver Bekirov ve Vadim Siruknıñ apiske alınmasından appelâtsion şikâyetlerini baqacaq.

«Enver Bekirov ve Vadim Siruk (terrorizm ile qabaatlanğan Qırım musulmanları) apiske alınmasına bergen appelâtsion şikâyetlerim Qırımnıñ Yuqarı mahkemesinde 2016 senesi fevral 29-da saat 10:00 baqılacaq», – dep yazdı Facebookta adliyeci.

Onıñ bildirgeine köre, Müslim Aliyev ve Emir-Üsein Kukunıñ apiske alınmasından şikâyetleri fevral 29-da saat 11-de baqılacaq.

Qırımda fevral 11-de qırımtatarlarnıñ evlerinde tintüvler olıp keçti. 12 insan yaqalandı, sorğulardan soñ çoqusı azat etildi. Qırımnıñ Rusiye prokurorı Natalya Poklonskaya «Hizb ut-Tahrir» terroristik teşkilâtınıñ» faaliyeti aqqında cinaiy iş boyunca 4 insan yaqalanğanını bildirdi.

Fevral 12-de yaqalanğan dört kişi apiske alındı. O künü daa tahminen on tintüv keçirildi.

Qırımtatar Milliy Meclisi buña qırımtatarlarğa qarşı repressiyalarnıñ yañı dalğası dep ayta. Ukraina Tış işler nazirligi fevral 12-de narazılıq bildirip, Rusiyege qarşı basqını arttırmağa çağırdı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.