Meclis içün granata: Hersondaki patlav kimniñ iÅŸi

Kiyev – Fevral 6-dan 7-ne keçer gecesi Qırımtatar Milliy Meclisiniñ Herson temsilciligi binasında patlav yüz berdi. İlk malümatlarğa köre, belgisiz şahıslar ofis qapusına granata atqanlar. Meclis adiseni Rusiyege qoltutqan küçlerniñ teraktı dep saya. Ekspertler seslendirgen malümatqa köre, yarımada mahsulat qamaçavından zarar körgen tuccarlarnıñ alâqası da ola bile.

Patlav Meclisniñ Herson ofisinde gece saat ekilerde yüz berdi. Patlav sesinden uyanğan yerli sakinler politsiyanı çağırğanlar. İçki işler nazirliginiñ matbuat hızmeti bildirdi ki, patlav neticesinde mağaz qapusı zarar kördi, kimse yaralanmadı. Ücüm vaqtında ofiste kimse yoq edi.

«Uquq qoruyıcılar adise yerini diqqatnen baqıp çıqtılar. Teşkerüv vaqtında ekspertler RGD-5 granatasına ait parçalar, alqa ve prujinanı tapqanlar», – dep bildire İİN.

Politsiya ilk hulâsağa köre adiseni terakt olaraq tanıp, Ukraina Havfsızlıq hızmetine (SBU) muracaat etti. SBU Herson yolbaşçılığınıñ matbuat hızmeti şimdilik izaat bermedi, amma Qırım.Aqiqatnıñ mühbirine soñra malümat berecegini vade etti.

Meclis binasındaki patlav Hersonda ilk degildir. 2015 senesi sentâbr 30-da bu şeerde yerleşken Ukraina Prezidentiniñ Qırım Muhtar Cumhuriyetindeki daimiy temsilciligi binasında patlav yüz bergen edi. O adiseni de terakt olaraq tanıdılar. Qabaatlılar alâ daa tapılmadı. SBU Herson vilâyeti idaresiniñ matbuat hızmeti bildire ki, bu iş boyunca taqiqat devam ete, faqat prezident temsilciligi ve Meclis binasındaki patlavlar arasında bağ barmı bildirilmey.

Rusiye izi

Herson şeeri Meclisiniñ reisi İbragim Suleymanov da bunıñnen razı.

«Qayd etem ki, terroristik akt bu, yaramazlarnıñ işi degil. Adamlarnı, yerli sakinlerni, belki de, qırımtatar faallerini qorquzacaq olalar», – dep fikirlerinen paylaştı Suleymanov Qırım.Aqiqatqa.

1:03

«Terror areketi edi», – Ä°braim Suleymanov

â–¶

0:00:00

â–¶

â–¶

DoÄŸru link

• 270p | 1.6MB
• 360p | 2.2MB
• 720p | 5.6MB

Onıñ zanınca, patlav Qırımnıñ Ukraina nezareti altına qaytmasına qarşı çıqqan Rusiyege qoltutqan küçlerniñ işi ola bile.

Herson Meclisiniñ sabıq reisi Asan Aliyev de aynı fikirde. Onıñ aytqanına köre, bunıñ kibi şeyler Geniçesk rayonında da ola bile, anda qırımtatarlar çoq.

Asan Aliyev

«Er şey ola bile, rayonımız pek tınç da degil. Öyle bir vaqıtta yaşaymız ki, er şeyni beklemek mümkün. Bu örnektir, ebet, muqayt olmaq kerekmiz», – dedi Aliyev.

Onıñ aytqanına köre, Qırım ile sıñırı olğan qıtaiy Ukrainada Rusiyege qoltutqan bir çoq insan yaşay, bu sebepten regiondaki vaziyet zordır.

«Bizler mümkün olğanı qadar qarşı çıqamız, teşviqat keçiremiz. Bizim vilâyetimizde böyle bir şey kesen-kes kerekmey», – dep ayttı Aliyev.

Qırımtatar Milliy Meclisiniñ reisi Refat Çubarov emin ki, Hersondaki patlav – Rusiyege qoltutqan küçlerniñ işi.

Refat Çubarov

«Qırımtatar Milliy Meclisiniñ reberligi yüz bergen adiseni Rusiyege qoltutqan küçlerniñ Ukraina cenübinde, şu cümleden Herson vilâyetinde vaziyetni kerginleştirmek maqsadı ile yapqan provokatsiyası olaraq tanıp, Ukraina uquq qoruyıcı organları cinayet şartları, sımarış bergenlerni ve yerine ketirgenlerni yaqın vaqıtta ögrenecegine ümüt ete», – dep yazdı Çubarov Facebook saifesinde.

Versiyalar

Qırım Rusiye akimiyetiniñ vekilleri Hersondaki patlavğa quvanğanlarını gizlemey. Baş nazir muavini Ruslan Balbek bildirdi ki, granata Meclisniñ «olmaycaq areketlerine» cevap olaraq atıldı.

«Hersonda vilâyetni Meclis hızmetçilerinden temizlemek içün partizan areketi başlana. Adiy sakinler para talap etken ve aydutlıq yapqan Cemilev insanlarınıñ aydut areketlerinden boldurğanlar», – dedi o.

Taras Berezovets

Ukraina siyasetşınasları Hersondaki adisenen bağlı farqlı fikirlerni seslendireler. Misal olaraq, «Free Crimea» leyhasınıñ müellifi Taras Berezovetsniñ fikirince, patlav ticaret qurulışlarınıñ işi ola bile. Meclis teşebbüsi ile başlağan mahsulat qamaçavı Qırımğa mal taşığan tuccarlarğa maddiy zarar ketirdi.

«İşğal etilgen topraqlarğa mal taşıp kâr qazanğan eki tarafnıñ taşıycıları da ola bile. Olarnıñ qamaçavdan sebep zararları on million dollarnı teşkil ete», – dep ayttı Berezovets Qırım.Aqiqatqa.

Siyasetşınasnıñ fikirince, ücüm mesüliyetini kimse boynuna almadı. «Ticaret zıddiyeti olğanda kimse aytmaz, çünki ticaret qurulışınıñ sımarışı bar, olarnıñ siyasiy talapları olmay», – dep qayd etti siyasetşınas.