Qırımğa elektrik berilmesi eki basamaqtan ibaret olacaq: birinci elektrik ağları açılğan soñ Qırım elektrik energiyasınıñ 20-25% alacaq. Rusiye akimiyeti Qırımda apiske alınğan doquz siyasiy mabusnı azat etse, o vaqıt daa bir elektrik ağı çalışmağa başlaycaq, dep ayttı Ukraina prezidentiniñ qırımtatar halqı işlerinden vekâletlisi Mustafa Cemilev. O, Qırımğa elektrik energiyasını berüv yañı añlaşması Ukraina içün elverişli olacağına ümüt ete.
Cemilevniñ aytqanına köre, ilk 220 MVt Qırımğa bir de bir şart qoyulmayıp kirecek, çünki hastahane ve içtimaiy infrastruktura müessiseleriniñ işi toqtatılmamaq kerek. O, Qırımnıñ Rusiye akimiyeti onı asker ve politsiyağa sarf etecegini de red etmey. Qırımda işlep çıqarılğan elektrik energiyası ve dizel taşıma elektrik stantsiyaları yarımada ihtiyaclarınıñ aman-aman 30% qarşılay. Buña daa 25% (220MVt) qoşulsa, yarımada kerek olğan elektrik energiyasınıñ yarısını alacaq.
Bir aydan soñ Qırımğa elektrik energiyasını berüv añlaşması bitmekte. Baş nazir Arseniy Yatsenük qırımtatarlarnıñ liderini yañı añlaşma Meclis ile muzakere etileceginde işandırdı. Şimdiki añlaşma qanunlarğa uymay ve Ukraina içün elverişli degil, dep aytalar añlaşmanıñ mündericesi ve imzalama tarihını ögrengen ükümet komissiyasınıñ azaları.
Mustafa Cemilev«Anda qaza olmaması içün, hastahaneler zarar körmesin dep, birinci 220 MVt berecekmiz. Amma esas diqqat yañı añlaşmağa ayırılacaq, çünki imzalanğan añlaşma elverişli degildir. Aytqan şartlar esasında añlaşma tekrar baqılmalı», – dep ayttı Cemilev jurnalistlerge.
Onıñ bildirgenine köre, Qırımnıñ naqliyat qamaçavı ştabınıñ reberi ile mesleatlar keçirilgen soñ elektrik ağlarınıñ tamiri başladı.
Energetika ve kömür sanayısı naziri Vladimir Demçişin 5 kün içinde Qırımnı elektrik energiyasınen temin etmege azır olğanını bildirdi.
Sergey Danilov Yaqın şarq tedqiqleri merkeziniñ eksperti Sergey Danilov nazirniñ aytqanlarını tenqit etmege çağıra. «Vaziyet tekrarlanmasın dep, doğru tehnik qararlarnı almaq kerek. Vaqıt kerek. Nazir er şeyni tez-tez yapacağını ayta. Amma yaparmı – büyük bir sual», – dep ayttı Danilov Qırım.Aqiqatqa.
«Maydan inostrannıh del» hayriye fondu nezaret şurasınıñ reisi Bogdan Yaremenkonıñ zanınca, 2016 senesi de Qırımğa elektrikler berilecek, amma ne miqdarda ve angi şartlar esasında aytmağa azır degil. Ekspertniñ fikirince, ükümet Qırım işğaliniñ aqibetlerine alâ daa kerek olğanı qadar qıymet kesip olamadı.
Bogdan Yaremenko «Ükümetimiz ayrı biznes taqımlarınıñ menfaatlarına zarar ketirip, devlet menfaatlarını köz ögüne alaraq, areket etmege azır olğanını aytmaq pek qıyın. Mesele şu ki, devlet menfaatları içün areket etmege azırmı», – dep ayttı o Qırım.Aqiqatqa.
Aynı vaqıtta, qırımlılar elektrikler kesilgen soñ başlanğan qıyınlıqlarğa dayanmağa azır olğanını bildireler. Rusiye akimiyetiniñ tarafdarları baqışlarından vazgeçmediler, amma Ukrainağa qoltutqan qırımlılarnıñ fikirleri de deñişmedi.
Aqmescit sakini Zarina bir elektrik ağı çalışıp başlasa, yarımada tolusınen elektrik energiyasınen temin etilir, dep qorqa. «Birini çalıştırıp, başqalarnı da açarlar yavaş-yavaş. 80-90-ıncı yıllarda bizni aşalay ediler, vaqtınca qurulğan inşaatlarda bala doğura edik, qayd olmağan olsañ, hastahanege almay ediler – ışıqsız, suvsız er şeyge dayandıq. Şimdi dayansınlar», – dep ayttı o Qırım.Aqiqatqa.
İlmi Ümerov Meclis reisiniñ muavini İlmi Ümerovnıñ fikirince, qıtadan Qırımğa elektrikler berilmemek kerek. «İşğalcinen alış-veriş olacaq, Rusiye maqtandı ya, çaresini de özü tapsın. Yaqarı yeter», – dedi o Qırım.Aqiqatqa. İşğalden soñ Qırımda qalğan Ümerov «Ukrinterenerge» devlet şirketi imzalağan elektrik energiyasınıñ berilmesi aqqında añlaşmanı «satqınlıq» dep adladı. Yatsenük ve Cemilevniñ aytqanlarına baqılsa, Qırımğa elektrikler berilmesi aqqında añlaşma uzatılacaq. Aynı vaqıtta, vesiqanıñ yañı metni daa azırlanmay. Şimdiki añlaşma dekabr 30-da bite.