નવગુજરાત સમય. અમદાવાદ
ભારતની મહાન એથ્લેટ પી. ટી. ઉષા એક કોચ તરીકે પણ અસામાન્ય સફળતા હાંસલ કરી રહી છે અને હવે તે ગુજરાતમાં એથ્લેટ્સને તાલીમ આપવાની છે. તાજેતરમાં એશિયન ગેમ્સ અને કોમનવેલ્થ ગેમ્સમાં ભારતે જે સફળતા મેળવી છે તેમાંથી કેટલાક એથ્લેટ્સ પી. ટી. ઉષાના હાથ નીચે તૈયાર થયા છે. ભવિષ્યમાં આ પ્રકારની ઇવેન્ટમાં ગુજરાતી ખેલાડી પણ મેડલ જીતે તો નવાઈ નહીં કેમ કે તેના માટેનો તખતો રચાઈ ગયો છે અને વડોદરામાં સ્પોર્ટ્સ ઓથોરિટી ઓફ ગુજરાત (એેસએજી) દ્વારા નવા બંધાયેલા સ્પોર્ટ્સ કોમ્પલેક્સમાં પી. ટી. ઉષા તાલીમ આપશે.
ઉષાએ આ અંગે જણાવ્યું હતું કે ગુજરાતમાં અલગ અલગ છ સ્થાને નવમીથી ૧૪મી નવેમ્બર દરમિયાન ટ્રાયલ્સ યોજાનારા છે અને તેમાંથી આગળ આવનારા એથ્લેટ્સને હું તાલીમ આપીશ. ભવિષ્યમાં તેમને ઇન્ટરનેશનલ લેવલ માટે મારે તૈયાર કરવાના છે.
મારા માટે આ નવી જવાબદારી છે અને તેના માટે હું આતુર છું. છેલ્લા એક વર્ષથી એસએજીના ડાયરેક્ટર જનરલ સંદીપ પ્રધાન આ પ્રસ્તાવ સાથે મારી સાથે ચર્ચા કરી રહ્યા હતા પરંતુ તેને આખરી ઓપ અપાતો ન હતો. હવે આ શક્ય બન્યું છે તેમ ઉષાએ ઉમેર્યું હતું.
એક જમાનામાં ભારતની સૌથી ઝડપી દોડવીર તરીકે પંકાયેલી પી. ટી. ઉષાએ વધુમાં જણાવ્યું હતું કે તેઓ ગુજરાતમાં ઉષા સ્કૂલ ઓફ એથ્લેટિક્સ સ્થાપવા માગે છે. જે રીતે કેરળમાં એથ્લેટિક્સ સ્કૂલ છે તે રીતે તેઓ તેમના રાજ્યમાં પણ ભાવિ એથ્લેટને તૈયાર કરવા માટે પ્રયાસ કરી રહ્યા છે. તેઓ યુવાનોને નાની વયથી જ એથ્લેટિક્સ તરફ વાળવાનો પ્રયાસ કરી રહ્યા છે.
વડોદરામાં સ્પોર્ટસ ઓથોરિટી ઓફ ગુજરાતના સ્પોર્ટ્સ કોમ્પલેક્સની સવલતોથી પી. ટી. ઉષાએ સંતોષ વ્યક્ત કર્યો હતો. તેણે જણાવ્યું કે ગયા વર્ષે મેં વડોદરાની મુલાકાત લીધી હતી અને ત્યાંનો ટ્રેક પણ ખૂબ સરસ છે.
પી. ટી. ઉષા છેલ્લા ૧૨ વર્ષથી કેરળમાં ઉષા સ્કુલ ઓફ એથ્લેટિક્સ ચલાવે છે અને તેને ગજબની સફળતા મળેલી છે. આ સ્કુલે નેશનલ લેવલ પર લગભગ ૭૦ મેડલ જીતેલા છે. ટિન્ટુ લુકા અને જેસ્સી જોસેફ જેવી ખેલાડીઓ આ જ સ્કૂલની દેન છે.
હજી બે દિવસ અગાઉ કેરળ સરકારે પી. ટી. ઉષાને બેસ્ટ કોચ તરીકે પસંદ કરવામાં આવી હતી. આ માટે તેને જી. વી. રાજા એવોર્ડ પણ એનાયત કરાયો હતો.
જાણો આજનો તમારો દિવસ કેવો રહેશે?
સેક્સ આનંદ મેળવવા ઉપરાંત સ્વાસ્થ્ય માટે પણ ખૂબ જ ફાયદાકારક છે
બોલિવૂડ, રાજનીતિ, સ્પોર્ટ્સ અને ઉદ્યોગ જગતના ધુરંધરો જોવા મળશે