Minis defans Lèzetazini an, Chuck Hagel, deklare : “Menas militan ekstremis Leta Islamik lrak ak Levan an poze pou sekirite mondyal la se yon bagay moun potko janm wè.” Misye Hagel fè deklarasyon sa a jedi 21 out 2014 la, swa yon jou aprè nouvèl te fè konnen militan islamik yo te koupe tèt jounalis ameriken James Foley ki te tonbe anba men yo sa gen preske 2 zan. Minis Hagel di:
“Militan Eta Islamik Irak ak Levan an se yon gwoup ki tèlman sofistike e yo gen tèlman bon jan finansman, se bagay moun pat janm wè. Yo pi byen òganize pase yon senp gwoup teworis. Yo melanje ideyoloji ak eksplwa militè ki makonnen taktik ak estrateji yon fason sofistike. kantapou afè finans la, yo byen finanse seryezman; se yon sitiyasyon nou pat janm wè jiskela. Nou dwe prepare nou pou tout bagay.”
Pandan minis Chuck Hagel tap pale konsa, li te gen bò kote Ii kòmadnan Wo Eta Majò Lame amerikèn nan, Jeneral Martin Dempsey. Daprè Jeneral Dempsey, militan islamik ekstremis yo se yon gwoup kap difisil pou moun bat. Misye Denmpsey te genyen, dayè, pou l te reponn kesyon yon jounalis ki te mande eske pa gen mwayen pou moun frennen aktivite mesye esktremis sa yo. Jeneral la te reponn:
« Wi, repons la se: Gen mwayen pou moun rete yo sou kous yo, men pa endefiniman, pa pou tout tan. Se yon òganizasyon ki pa sispann komèt dega katastwofik, krim efrayik sou wout li; e finalman fòk genyen yon vizyon estratejik ki pou pèmèt yo pèdi batay la. Si kesyon an se: Eske moun ka bat yo san yo pa rezoud pwoblèm ki poze nan Siri kote gwoup la tabli katye-jeneral oganizasyon yo a ? Ebyen, repons la se non. »
Pandansetan, sou teren an nan Irak -pi presizeman nan pati nò peyi a- fòs kird yo lanse yon operasyon pou yo dechouke militan Leta Islamik la nan yon vil estratejik yo te pran nan zòn nan nan dat 11 out pase a. Se vil Jalawla ki sou yon distans 115 kilomèt o nòdès Bagdad. Otorite yo fè konnen konbatan peshmerga yo, yon branch nan fòs kird yo, deja repran anpil katye nan vil la nan batay ki dewoule byen bonè vandredi 22 out 2014 la.