WASHINGTON DC— Nan vil Ferguson, ki nan Eta Missouri, nan pati sid Lèzetazini, konfwontasyon dowoule ant Lapolis ak manifestan byen ta lendi 18 out 2014 la aprè lanmò yon jenn gason nwa anba bal yon polisye blan nan dat 9 out pase a. Non viktim nan se Michael Brown. Li te genyen 18 tan. Non polisye ki touye l la se Darren Wilson.
Lapolis anti emet lanse kout gaz lakrimojèn ak grenad paralizan sou manifestan ki te rasanble nan lari vil la kote dezòd ak katastwòf tabli finalman aprè yon seri de manifestasyon pasifik. Kèk moun nan foul la te lanse cocktail Molotov sou polisye yo ki te ame ak gwo zam lou, e moun te ka tande kout-zam ki tap pati.
Kaptenn patwouy otowout Eta Misouri, Ron Johnson, ke gouvènè eta a, Jay Nixon, te chwazi semèn pase a kòm responsab sekirite vil Ferguson, pale ak laprès byen bonè madi 19 out la pou l di yon ti minorite zwit pami manifestan yo te ouvè koutzam sou lapolis. Kaptenn Johnson deklare :
"Tout moun ki te mele nan mouvman pwotestasyon sa a kapab konprann bagay yo te ka debouche sou gwo danje pandan nannuit la. Yon ti minorite pwovokatè te kache nan mitan foul la epi yo kòmanse kreye dezòd. Se konsa, yo te pran voye boutèy, lanse cocktail molotov ak bonm dife. An jeneral, moun kap pwoteste fè sa yon fason pasifik e nan lapè. Manifestan pa fè konfwontasyon ak lapolis. Yo pa lanse cocktail molotov. Se kriminèl ki fè sa ; e lè yo poze zak konsa, yo mete lavi ak pwopriyete moun an danje. "
Kaptenn Johnson ajoute lapolis poze arestasyon 31 moun nan manifestasyon ki dewoule lendi a, e 2 lòt blese anba koutzam ki te sòti nan foul la. Avoka kap defann fanmi jenn gason ki te tonbe anba bal polisye a, fè konnen viktim nan te deja dispoze rann tèt li lè ajan polis Darren Wilson te ba li bal ki touye l la.
Pou le moman otorite yo mete polisye Wilson an vakans peye, ann atandan yon ankèt fin fèt sou afè a. Minis jistis ameriken an, Eric Holder, gen pou l ale nan vil Fugerson mèkredi 20 out la, sou enstriksyon Prezidan Barack Obama, pou l konnen dènye detay sou ankèt kap fèt sou lanmò jenn gason an. Chèf Depatman Jistis la genyen tou pou l rankontre ak lidè kominotè yo nan Ferguson nan kad efò lap fè pou retabli lapè nan vil la ki pa lwen ak yon gwo metwopòl Eta Missouri, vil Saint Louis.