WASHINGTON— Chizvarwa cheZimbabwe chiri muchirongwa che Washington Fellowship for Young African Leaders, Muzvare Abigail Muleya, vanoti sangano ravo reZubo Trust riri kubatsira madzimai ekuBinga mukuita mabasa anovawanisa chouviri.
Muzvare Muleya vanoti rwendo rwavo rwekuAmerica pasi pechirongwa chehurumende yeAmerica, che Young African Leaders Initiative, rwuri kuvapa mukana wekupangana mazano nevamwe vechidiki vakabva kunyika makumi mana nepfumbamwe dzemu Africa.
Chirongwa ichi chine vechidiki mazana mashanu.
Mutungamiri weAmerica, VaBarack Obama, varemekedza Muzvare Muleya neMuvhuro apo vakasangana nevechidiki ava muWashington DC.
VaObama vakati mabasa akadai seari kuitwa naMuzvare Muleya kuBinga anofanirwa kuremekedzwa zvikuru.
Muzvare Muleya, avo vari kuita zvidzidzo zvavo paTulane University pasi pechirongwa ichi, vanoti kana vadzokera kumusha vachanopawo ruzivo rwavawana kune mamwe madzimai avanoshanda nawo kuMatabeleland North.
Muzvare Muleya vane chitupa cheBachelor of Arts (African Languages and Culture).
Hurukuro naMuzvare Abigail Muleya