Qırım «spikeri»Vladimir Konstantinov qırımtatar milliy Meclis azalarını region akimiyeti ile «yañı Qırım»nı qurmağa çağıra.
Bunı o, çarşenbe künü, iyül 30-da, Aqmescitte «parlament» toplaşuvından soñ jurnalistlerge bildirdi, dep haber ete Qırım.Aqiqat mühbiri.
«Meclisniñ ayırı azalarınıñ mevamı yalıñız bozuluv degil de, siyasiy ceetten amelge keçmeycek bir şeydir. Olar Qırımda yaşamaylar, em de olayatqan adiselerge qıymet kesip olamaylar», – dedi o.
Konstantinov şimdi Qırımda «spiker muavini» olğan Remzi İlyasovnıñ faaliyetini müsbet misal olaraq ketirdi.
«Remzi İlyasoviç cümhuriyet Delvet şurası künlerinde iştirak ete, köylerge bara, mitinglerde iştirak ete. O, insanlarnıñ, şu cümleden qırımtatarlarnıñ da keyfini köre. Bayağı mesele toplandı endi, olarnı bir kimse çezmeli. Akimiyet bugün bunı becermege azır», – dedi Konstantinov.
Onıñ malümatına köre, Rusiye Qırımğa sürgün etilgen vatandaşlar programması boyunca 800 million ruble ayırğan eken.
«Bu kibi yardımnı, Meclis azaları içün hatırlatam, biz iç bir vaqıt körmedik – ne Yuşçenko, ne Kuçma, ne Yanukoviç zamanında, – dedi Konstantinov. – Meclis azalarınıñ büyük bir qısmı aqıllı insanlar olğanını tüşünem ve olar yañı Qırımnıñ endi başlanğan qurucılıq ketişatına qoşulır».
Qırımtatar milliy Meclis reisi Refat Çubarovğa yarımadağa kirişini yasaq ettiler, Qırım «prokurorı» ise atta Meclis faaliyetini yasaq etmege vade etti. Bundan evel bu kibi yasaq qırımtatarlarnıñ milliy lideri Mustafa Cemilevge de berildi.
Evel Meclis «Qırım Devlet Şurası»na saylavlarnı boykot etmege çağırdı.