İyün 26 künü Qırımda qırımtatar milliy Bayrağına bağışlanğan tedbirler ötkerile.
Radіo Svoboda ve Qırım.Aqiqat saytı saat 17.00 den (Kiyev vaqtına köre saat 16.00 dan) başlap, canlı şekilde bu tedbirlerni kösterecekler.
Esas tedbirler Aqmescitniñ Borçoqraq qasabasında, qurulıp bitirilmegen mektepniñ ögündeki meydançıqta teşkil etildi.
Programağa binaen, birinci olıp «Bizim taraf» yarışında balalar iştirak etip, resim etmek qabiliyetlerini kösterecekler, ondan soñ, «Bayrağım» fotoresim yarışı ötkerilecek. Bunen beraber, aşçılar yarışlaşacaqlar, milliy-ameliy sanaat nümüneleri sergilenecek, «Bilgi quveti» kvesti ötkerilecek. Aqşam ise, qırımtatar sanaat erbaplarınıñ iştiraginen kontsert keçirilecek.
Akimiyetniñ yasaq etkenine baqmadan, avtomobil yürüşi de teşkil etildi. Teşkilâtçılarnıñ aytqanına köre, avtomobil yürüşiniñ yolu evelden belgilenmegen edi, iştirakçiler ise para cöremesine oğratıla bileler.
Qırımtatar Bayraq künü munasebetinen iyün 26 nda Kiyev ve Tbiliside tedbirler teşkil etildi.